نصائح جامعية

بعض النصائح لطلبة الجامعة (ولاد 👨وبنات👧طبعا)

الجامعة شر لا بد منه...

خاصك تعرف أن أكبر غلط هو أنك كتربط راسك بالإمتحانات طول السنة..وهاد الشي لعدم مقدرتك على تنظيم وقتك...
فترة الجامعة بالنسبة ليك هي الفترة لي تقدر تحدد فيها مكانك ف المجتمع..بغض النظر على مستوى أهلك الإجتماعي..وفيها كتحدد هل فترة شبابك غتكون كلها ملل وفشل أو غتكون بداية تجربة ناجحة..
هادو نصائح خاصك تدخلهم لبرنامجك اليومي.. :
- تعلم إدارة الوقت... عندك 24 ساعة ف اليوم لا ستغليتهم صح غتلقى الناس كتسولك "كيفاش تعلمتي لهاد الشي كامل"
- دير الخير مهما كان صغير..عمل الخير غادي يصقل شخصيتك للأفضل ، عاون الطلبة فأي حاجة تنفعهوم.
- دخولك لمواقع التواصل خاصو يكون بلحساب ...
- عوّد نفسك وتعلم مهارة البحث عن المعلومة... ماتسناش من الناس يفهموك كولشي...
- كل يوم قرا مقالة جديدة أو بحث جديد... ويُفضل مايكونش ف مجال دراستك... قرا فمجالات متنوعة... وماتخليش نهار يدوز بلا ماتعلم حاجة جديدة.
- عاشر من هم أكبر منك سنا وأعلى منك في المستوى سواء ف العمل أو الدراسة ... تعلم منهم... كل شخص عرفتيه ضروري عندو شيئ مميز خاصك تتعلمو منو ...
- اللغة اللغة اللغة...مهمة جدا جدا. تعلم راه دابا سبل التعلم كلها متوفرة ف النت ومجانا... ماعندكش حجة.
- بعد على المشاكل والصداعات الخاوية لي ماغادي تربح منها والو ... وبعد من داك الصديق الفنيان لي كيحاول يجرك معاه للقاع...
- سواء عندك الفلوس ولا لا عود راسك تقلل كمية متطلباتك وحاول تنزلها للنص أو الثلث... وهذا ماشي بخل.. .ولكن باش تتعلم كيفاش تتعامل ف المواقف الصعبة.
- أي فرصة تعلم أو طريقة مشروعة لربح المال طاحت بين يديك جربها وتعلم منها... وحاول تخدم ف العطل منها تستافد من تجارب العمل ومنها دخل مادي غادي ينفعك...
- بعد قدر الإمكان على الدراما والحب المدبلج لي ماعندو حتى نفع... لأن هاد الشي غيكون عائق كبير في بناء مستقبلك... ركز على قرايتك وخدمتك.
- ستافد وتمتع بأيام العطل وخرج ودور وتسارى باش تتشارجا طاقة إيجابية...
- تعلم تكون عندك القدرة على البيع مهما كان مجالك الأساسي... مهارة البيع كنحتاجوها فحياتنا اليومية.
- حاول توفر ماتقدر عليه من المال... فتح كونط ف البوسطة وبقى تجمع فيه بلي قديتي... غينفعوك ف وقت ماغادي تلقى حتى واحد يعطيك...

هاذو نصائح بسيطة لا درتي بيها غتساعدك بزاف ف بناء طريقك نحو المستقبل..وفي اعتمادك على نفسك فقط..
هو هادا و كيف العادا ، إلى وصلتي لهنا و ستافدتي كليكي على جيم و خلي شي كومونطير، سواء تساؤل أو تحفيز أو إضافة . و ماتنساوش تبارطاجيو الصفحة مع الأصدقاء ديالكم ، و شكرا على تفاعلكم .