" أصعب مرحلة ممكن يمر منها أي طالب جامعي ماشي هي أول عام ديالو ولا طريقة التأقلم، هادشي ليه الدوا و يداوا، الصعب ف الأمر هو مور ماتشد الليصونص ديالك و كيبدا داك الهاجس ديال "إيلا ماتقبلتش ف شي ماستر شنو غندير" ! موقف لا نحسد عليه صراحة ..
لدرجة كتولي جالس و منكري غير راسك، واقيلا هاداك لهيه كيشوف فيا .. هادوك كيتعاودو عليا .. الشوفة د والديك .. الشوفة د المحيط ديالك كأن حال لسانهم يقول "هاهو قرا تا عيى و فلخر جلس".
ممكن تصدر منا تصرفات مايتقبلهاش الآخر، و تجيه غريبة لدرجة يقدر ياخد منك موقف، لهؤلاء أقول : "إلتمسوا لنا عذرا حين لا ترونا بالوجه الذي تعودتم عليه، فللنفس آفاقا و وديان .. و لعلنا في واد غير واديكم ! فرفقا بنا".
حقيقة ماشي هادي الحياة لي اختارينا لراسنا، و ماشي هادشي باش كنا كنحلموا .. الواقع حاجة اخرى، لدرجة شي مرات كيتفرضو عليك شي حوايج نتا براسك ماباغيهومش.
من بعد مثلث الشر و مربع الطمأنينة و المكعب السحري لي كنت هضرت عليهم ف مناسبات سابقة، و دائما مع الأشكال الهندسية غادي نمثل الحال ديالنا ف شكل جديد سميتو "دائرة التيه"، مثلا كتكون وسط شي بيت دائري و كتبدا تقلب على شي زاوية تتخبى فيها ! يعني شي حاجة مستحيلة، و لكن إيلا جبتي شوية د الأثاث و عمرتي بيه البيت تقدر تخلق قنااات هوما ماشي غير قنت ..
كذلك الشيء نفسه بالنسبة لينا، "البيت الدائري" هو الحال لي حنا فيه، داك "القنت" علاش كتقلب هو "الماستر" ولا "الخدمة"، لي هوما الخلاص ديالك من هاد "التيه" .. بقات حاجة وحدة هي "الأثاث" .. هاد الأثاث يقدر يكون "مكتسباتك" و "قرايتك" لي غادي يخولو ليك تحقق لي بغيتي، ولكن ف حالة ماتوفقتي ف تا وحدة من هادو، شنو الحل ؟ الحل هو دير كوردة و تشنق راسك هههههههه .. لا لا كنضحك، الحل ماتبقاش جالس ف بلاصتك، و تنوض تحيد عليا داكشي باش عمرتي البيت و تخليه خاوي و دور ليا شوية مع راسك حاول تصنع هاد القنت ب يديك ماشي بالضرورة القراية، شوية د السطاجات عمر بيهم السي-في، حاول تخصص واحد النهار ولا يوماين و طبع شي عرام د السيفيات و بقى غي دور و دفع، ماتخلي لا شركات، لا معامل، المهم ماتوقفش .. خدم ف سوطر دآپيل، قرا شوية كتوبة، ثقف راسك (ماشي لافاك هي لي كتوعي بنادم) المهم ماتبقاش جالس باش ماتمرضش و تمرض تا هادوك لي معاك؛ و حبذا يكون هادشي ف بلاد بعيدة على داركم .. ويلا تأملتو معايا هادشي ف واحد القضية، التفاحة عندها شكل دائري غي كلا واحد كيفاش تعامل معاه، نيوتن خرج لينا بها قانون ليومنا هذا باقي كياخد الدعاوي عليه، إخواننا المجاهدين العرب صاوبولنا بيها المعسل، و ستيف جوبز ضربليها عضة و دار فيها واحد القنت لي خلاه يغزو العالم (مي بون واخا ماشي شي قنت نيييت ولكن كيتسمى خرق القاعدة 😜)
مور هادشي كامل غادي يجيب الله التيسير، و نوي الخير يجيك الخير إن شاء الله و غادي تعمر داك البيت المدور و تتزوج بوحدة كتعرف تغسل الدوارة و تجمعوا المال و تسافروا .. المهم هو البداية :D
ياللاه غادي غادي .. دي معاك هادي "
0 التعليقات:
إرسال تعليق