كلنا فاسدون

اجي نتفاهموا على واحد الحاجة ...
الحكومة المغربية فاشلة ... ويمكن تكون فاسدة وشفارة وبنت ستين ك***

ولكن اجي نتفاهموا على حاجة اخرى، الشعب حتى هو أكثر فسادا ...
الشعب ليس ضد الفساد ... يقدر يكون باغي غير حقه من الفساد ..

كل واحد من بلاصتو... عنده حقه في الفساد

انا من حكم تجربتي في الحياة ... في المغرب ... خالطت الطبقة المحكورة في صغري ومن بعد خالطت شي طبقات أخرى بحكم المدرسة فين قريت وخدمتي... وسكنت في 4 مدن في المغرب ... وعرفت المتدينين المتشددين والسكايرية المؤمنين والملحدين والمثقفين والمحامين والاطباء...

نقدر نقول ليك من هذا العينة أن من بين كل 5 مغاربة كاين واحد 4 عندهم استعداد نفسي مسبق للفساد والإفساد...

مني تلقى السعاية قدام الجامع كايجي واحد جديد كايتكرفسو عليه ويمنعوه يسعى ... هذا اذا حطيتيه في الحكومة اشنو كتوقع منو..

البوليس اللي كايوقفك في الطريق شحال من واحد مامستعدش يأخذ الرشوة ... واخا تكون قاتل كاين واحد الثمن معين باش تخرج ...

الاستاذ اللي متواطئ مع التلاميذ اما بتسريب الامتحانات واما على الاقل بالسكوت على الغش ... زيد عليه هداك اللي كاتجيه من الجنة التلاميذ مايبقاوش يجيو...

الطبيب اللي بنادم يموت قدامه وهو يتفاصل على الثمن.. أو اللي يعطيك راديو انت مامحتاجوش باش يسرقك...

التلميذ الغشاش، مول التلفونات اللي ماتقدرش تخلي ليه التلفون حيث تخاف يطير ليك منو شي حاجة، المغربي كايخاف يكري دارو حيث عارف خوه المغربي يا اما ماغاديش يخلصه يا اما غادي يكرفس ليه الدار... المغربي كايدير إعلان في الفايس ويجي يقول ليك واش اذا ماخلصتش غادي يتابعوني...

عندنا السرقة عادي في الدم ... وكانخلقو ليها تبريرات عادي.. لا فرق بين المتدين والملحد... بين المثقف والجاهل ... الفساد ثقافة

ومادام احنا هكذا ... غادي يبقى ربي مسلطنا على بعضياتنا..

فكر قبل ما تدير لايك ... يمكن تكون الهدرة عليك ...
#اجي_تفهم_بالدارجة